* Tere baghair ye ab zindagii kahaa’n guzare *
Tere baghair ye ab zindagii kahaa’n guzare
qadam qadam pe tere saath kaa gumaa’N guzare
ye din jo dhiire se phisalaa to shaam ke manzar
tere baghair udaasii ke daramiyaa’n guzare
vo ashk huun ki sar-e-raah gir gayaa thaa kabhii
uthaa sakaa na koii kitane kaaravaan guzare
main Khushk hoke bikharataa rahaa hoo’n pairo’n me’n
bahut zamaanaa huaa mujh pe kashtiyaa’n guzare
tere badan kaa aalaao ho merii saanso’n me’n
kabhii vo lamhaa bhii ik baar jaan-e-jaan guzare
ye baat ab bhii nahii’n hai kisii se kahne kii
tamaam sajde tere dar se raayagaa guzare
|