|
* Kahte huye hayat ke afsane so gaye *
Kahte huye hayat ke afsane so gaye,
Sab ko jaga ke aap ke diwane so gaye,
Aa'nkhe'n khuli to jaag uthi subhe maikda,
Aa'nkhe'n huyee jo band to maikhane so gaye,
Phoolo'n ki sej par bhi kabhi muztarib rahe,
kaa'nto'n pe bhi kabhi tere deewane so gaye,
Ab waqt hai ke bargahe dil sajaiye,
Masjid ko niind aayee sanam khane so gaye,
Ab shama noor baar hai kis ke liye "Hafeez'',
jal jal ke soz-e- hijr me'n parwane so gaye.
|
|