Terii talaash me’n ham jab kabhii nikalate hai’n
ik ajanabii kii tarah raaste badalte hai’n

daraaz ho Gham-e-hijraa’n ki haasil-e-hijraa’n
vo hausale’n hai’n jo aaghosh-e-Gham me’n palte hai’n

ravaa nahii’n hai Gham-e-ishq is qadar bhii Gharuur
tere baGhair bhii duniyaa ke kaam chalte hai’n

kabhii jo had se badhii un kii yaad to samjhe
ki un ke dil me’n bhii kuchh valvale machalate hai’n

shab-e-firaaq kuchh aisii bhii tiiragii to nahii’n
kabhii kabhii sar-e-mizgaa charaagh jalte hai’n

ab un ke Gham se bhii maharuum ho na jaaye’n kabhii
vo jaanate hai’n ki is Gham se dil bahalate hai’n