* Baith jaataa hoo’n jahaa’n chhaanv ghanii hotii hai *
Baith jaataa hoo’n jahaa’n chhaanv ghanii hotii hai
haaye kyaa chiiz Ghariib-ul-vatnii hotii hai
din ko ik nuur barastaa hai merii turbat par
raat ko chaadar-e-mahataab tanii hotii hai
lut gayaa vo tere kuuche me’n rakhaa jis ne qadam
is tarah kii bhii kahii’n raahzanii hotii hai
hijr me’n zahar hai saaghar kaa lagaanaa muunh se
may kii jo boond hai hiiro’n kii kanii hotii hai
maikashon ko na kabhii fikr-e-kam-o-besh huii
aise logon kii tabiiyat bhii Ghanii hotii hai
hook uthatii hai agar zabt-e-fughaa’n kartaa hoo’n
saans rukatii hai to barchhii kii anii hotii hai
pii lo do ghuunt ki saaqii kii rahe baat "Hafeez"
saaf inkaar me’n Khaatir-shikanii hotii hai
|