Tuu bhii kisii kaa pyaar na paaye Khudaa kare ,
tujh ko teraa nasiib rulaaye Khudaa kare,
raato.n me.n tujh ko nii.nd na aaye Khudaa kare ,
tuu dar-ba-dar kii Thokare.n khaaye Khudaa kare,
aaye bahaar tere gulistaa.N me.n baar baar, 
tujh par kabhii nikhaar na aaye Khudaa kare,
merii tarah tujhe bhii javaanii me.n Gham mile ,
teraa na ko-ii saath nibhaaye Khudaa kare,
ma.nzil kabhii bhii pyaar kii tujh ko na mil sake ,
tuu bhii duaa ko haath uThaaye Khudaa kare,
tujh par shab-e-visaal kii raate.n haraam ho.n ,
shamme.n jalaa jalaa ke bujhaaye Khudaa kare,
ho jaaye.n bad-duaaye.n merii dosto Ghalat ,
ab un pe ko-ii harf na aaye Khudaa kare.