Baich kar subh apni, shaam na le
sakht manzil hai, tu qayaam na le

aag daaman mein hai, yeh dheyaan rahay
bhool kar bhee isse tu thaam na le

aashiqi hai khayal-e-rooh farsaa
koi yeh dard-e-na'tamaam na le

mujh ko fursat nahi hai marnay ki
apnay jalway se aisa kaam na le

iss jahaan-e-kharaab mein koi
bhool kar bhee wafa ka naam na le

ho na jis mein visaal-e-yaar tujhay
apnay lamhon mein aisi shaam na le

chahatein bandagi mein posheeda
devtaa ka kabhi maqaam na le