|
* Subah kii pahlii duaa se aashanaa hotaa huaa *
Subah kii pahlii duaa se aashanaa hotaa huaa ,
ek sannaaTaa hai maanuus-e-sadaa hotaa huaa,
[aashanaa=acquainted; maanuus-e-sadaa=familiar sound]
jaate mausam kii ajab tasviir hai chaaro.n taraf,
darmiyaa.N us ke hai ik pattaa haraa hotaa huaa ,
itanii aagaahii to hai mai.n ba.Dh rahaa huu.N kis taraf,
ye nahii.n maaluum kis se huu.N judaa hotaa huaa,
[aagaahii=to know beforehand]
ik navaa aahistaa aahistaa fanaa hotii hu_ii,
ek harf-e-sad-talab chup chup adaa hotaa huaa,
[fanaa=destroyed; harf-e-sad-talab=word for a thousand desires]
dekh mai.n apanii jagah se ik qadam sarakaa nahii.n
dekh terii hii nishaanii hai Khataa hotaa huaa
[sarakaa=moved]
ik nazar imkaa.N-hazaar-imkaa.N safar karatii hu_ii,
ek manzar sau parat yaksar nayaa hotaa huaa,
[imkaa.N-hazaar-imkaa.N=having numerous possibilities]
ba.Dh rahaa hai kaun apanaa raastaa lete hue,
apane ham_raaho.n se chupake se Khafaa hotaa huaa .
[ham_raah=fellow traveller; Khafaa=annoyed]
|
|