* Jazb-e-kaamil ko asar apnaa dikhaa denaa thaa *
Jazb-e-kaamil ko asar apnaa dikhaa denaa thaa
mere pahaluu me’n unhe’n laa ke bithaa denaa thaa
kuchh to denaa thaa tere taghaaful kaa javaab
yaa Khudaa ban ke tujhe dil se bhulaa denaa thaa
tair-e-jaan ke sivaa kisko banaate qaasid
us sitamgar ko paighaam-e-qazaa denaa thaa
dard mohtaaj-e-davaa ho ye sitam hai yaa rab
jab diyaa thaa to kuchh is se bhii savaa denaa thaa
vo jo bigade to Khafaa tum bhii hue kyo’n "Hasrat"
paa-e-nakhuvat pe sar-e-shauq jhukaa denaa thaa
|