Phir bhii hai tumako masihaa_ii kaa daavaa dekho
mujhko dekho, mere marne kii tamannaa dekho

jurm-e-nazzaaraa pe kaun itnii Khushaamad kartaa
ab vo roothe hai’n lo aur tamaashaa dekho

do hii din me’n vo baat hai na vo chaah na pyaar
ham ne pahale hi ye tum se na kahaa thaa dekho

ham na kahte the banaavat se hai saaraa Ghussaa
haNs ke lo phir vo unho’n ne hame’n dekhaa dekho

mastii-e-husn se apanii bhii nahii’n tum ko Khabar
kyaa suno araz merii, haal meraa kyaa dekho

ghar se har vaqy nikal aate ho khole hue baal
shaam dekho na merii jaan saveraa dekho

Khaanaa-e-jaan men namudaar hai ek paikar-e-nuur
hasrato aao rukh-e-yaar kaa jalvaa dekho

saamne sab ke munaasib nahii’n ham par ye itaab
sar se dhal jaaye na Ghusse me’n dupattaa dekho

mar mite ham to kabhii yaad bhii tum ne na kiyaa
ab muhabbat kaa na karnaa kabhii daavaa dekho

dosto tark-e-muhabbat kii nasiihat hai fazuul
aur na maano to dil-e-zaar ko samjhaa dekho

sar kahii’n baal kahii’n haath kahii’n paano kahii’n
us kaa sonaa bhii hai kis shaan kaa sonaa dekho

ab vo shokhii se ye kahte hai’n sitamgar jo hai’n ham
dil kisii aur se kuchh roz bahalaa dekho

havas-e-diid mitii hai na mitegii "Hasrat"
dekhne ke liye chaaho unhe’n jitnaa dekho