Ye aarzuu hai ki jab bhii gale lagaa_uu.N use,
hisaar-e-zaat se baahar nikaal laa_uu.N use,

vo jal rahaa thaa karhii dhuup kii tamaazat me.n,
milaa jo ab to orhhaa duungaa apnii chaa.Nv use,

ye ishq bhii hai ajab imtihaan-e-ahad-e-vafaa,
vo aazamaaye mujhe aur mai.n aazmaa_uu.N use,

vo shahar shahar chiraaGhaa.N sahii magar ek din,
havaaye.n yaad dilaaye.ngii apnaa gaa.Nv use,

vo apne Khvaab me.n shaayad mujhii ko dekhtaa ho,
mai.n tashnaa_lab sahii sote me.n kyaa jagaa_uu.N use.