|
* Ye aarzuu hii rahii ko_ii aarzuu karte *
Ye aarzuu hii rahii ko_ii aarzuu karte,
Khud apnii aag me.n jalte jigar lahuu karte,
tere jamaal kaa paratau nigaah me.n hotaa,
kabhii sabaa se kabhii gul se guftaguu karte,
[jamaal = beauty; paratau = reflection; sabaa = gentle breeze]
tere Khayaal me.n ghum hoke ek Ghazal kahte,
aur us Ghazal ko na rusvaa kuu-ba-kuu karte,
[kuu-ba-kuu = from street to street (galii-galii)]
ham ahal-e-dil ko bahut thaa ye nashshaa-e-Gham bhii,
usii sharaab se raushan subuu-subuu karte,
[subuu = (wine) pitcher]
ye ehtaraam-e-junuu.N hai ki sii liyaa daaman,
vagarnaa ek tamaashaa-saa kuu-ba-kuu karte,
[ehtaraam = respect; vagarnaa = otherwise]
hame.n yaqii.n hai ki gar tuu qariib bhii hotaa,
to duur jaake kahii.n terii justajuu karte.
[yaqii.n = belief; qariib = near; justajuu = search]
|
|