Niim_chaa yaar ne jis vaqt baGhal me.n maaraa,
jo cha.Dhaa muu.Nh use maidaan-e-ajal me.n maaraa,

[niim_chaa = dagger; baGhal = side; ajal = death]

us lab-o-chashm se hai zindagii-o-maut apanii,
kab-kabhii pal me.n jilaayaa kabhii pal me.n maaraa,

[kab-kabhii ~ kabhii kabhii; jilaayaa = bring to life]

ajal aa_ii na shab-e-hijr me.n aur ham ko falak,
be-ajal tuu ne tamannaa-e-ajal me.n maaraa,

[ajal = death]

aa.Nkh se aa.Nkh hai la.Datii mujhe Dar hai dil kaa,
kahii.n ye jaaye na is joang-o-jadal me.n maaraa,

[jang-o-jadal= war and battle]

na huaa par na huaa miir kaa andaaz nasiib,
'Zauq' yaaro.n ne bahut zor Ghazal me.n maaraa