TARAHI GHAZAL
Naye daur ka yeh sitam dekhte haiN
Her ek dil meN ranj-o-alam dekhte haiN
Dayar-e-Nabi jab bhi hum dekhte haiN
Haqeeqat meN aks-e-iram dekhte haiN
Tamanna ki takmeel hum dekhte haiN
unheN jab ba lutf-o-karam dekhte haIN
baseerat se khali hai jin ki basarat
who binaaee rakhkar bhi kum dekhate haiN
wo jinki saroN meN hai sauda-e-manzil
kahaN raah ke pech-o-khum dekhte haiN
naqaayes ka apni hai ehsaas jin ko
kisi ke ma’aayeb wo kum dekhte haiN
jabeen-e-aqeedat wahiN per hai jhukti
“ jahaN tera naqsh-e-qadam dekhte haiN “
Nahi apne qaboo meN rahta hai yeh dil
So unki taraf kum se kum dekhte hai
Zameen-e-Asadullah Ghalib meN “IrfaN”
Chalo kuchh laga kar qalam dekhte haiN
IRFAN BARABANKAWI , JEDDAH
++++++++++++++++++++