|
* Fareb khaaye huwe raNg-o-boo ke saraab ko poojta raha hooN *
Fareb khaaye huwe raNg-o-boo ke saraab ko poojta raha hooN
Magar nataaij ki roshni men, Khud apni manzil pe aa raha hooN
Jo dil ki gehraaiyyoN men sub'ha, zuhoor-e-Aadam se ho rahi hai
MaiN apni fitrat ki in KHudaa~daad quwwatoN ko jaga raha hooN
MaiN saaNs leta hooN har qadam par, ke bojh bhaari hai ziNdagi ka
Theh'r zara garm~roo zamaane, ke maiN tere saath aa raha hooN
Jahaaz~raanoN ko bhi ta'ajjub hai mere is 'azm-e-mutmayin par
Ke aaNdhiyaaN chal rahi haiN tuNd aur maiN apni kashti chala raha hooN
Tilism-e-fitrat bhi muskuraata hai meri afsooN~taraaziyoN par
Bahut se jaadu jaga chuka hooN, bahut se jaadu jaga raha hooN
Yeh mehr-e-taabaaN se koi keh de ke apni kirnoN ko gin ke rakh le
MaiN apne sehra ke zarre zarre ko KHud chamakna sikha raha hooN
Mira taKHayyul, mire iraade, kareNge fitrat pe huk'm~raani
JahaaN farishtoN ke par haiN larzaaN, maiN is bulaNdi pe ja raha hooN
Yeh naaz~parwardagaan-e-saahil, DareN miri sa'i-e-garm~roo se
Ke maiN samandar ki tund maujoN ko rauNd'ta paas aa raha hooN |
|