Zindagii ye to nahiiN tujhko saNvaaraa hii na ho,
kuch na kuch teraa ehsaan utaaraa hii na ho,
kuu-e-qaatil kii baRii dhuum hai, chal kar dekheN,
kyaa Khabar, kuuchaa-e-dildaar se pyaaraa hii na ho,
(kuu-e-qaatil : home of the murderer; kuuchaa-e-dildaar : house of the beloved) 
dil ko chhuu jaatii hai raat kii aavaaz kabhii,
chauNk uThtaa huuN kahiiN tuune pukaaraa hii na ho,
kabhii palkoN pe chamaktii hai jo ashkoN kii lakiir,
sochtaa huuN tere aaNchal kaa kinaaraa hii na ho,
zindagii ek Khalish de ke na rah jaa mujhko,
dard vo de jo kisii suurat gavaaraa hii na ho,
sharm aatii hai ke us shah’r meN ham haiN ke jahaaN,
na mile bhiik to laakhoN kaa guzaaraa hii na ho.