zaraa see der men dilakash nazaaraa doob jaayegaa 
ye sooraj dekhanaa saare kaa saaraa doob jaayegaa 

najaane fir bhee kyon saahil pe teraa naam likhate hain 
hamen maaloom hai ik din kinaaraa doob jaayegaa 

safeenaa ho ke ho patthar hain ham anzaam se vaakif 
tumhaaraa tair jaayegaa hamaaraa doob jaayegaa 

samandar ke safr men kismaten pahalu badalatee hain 
agar tinake kaa hogaa to sahaaraa doob jaayegaa 

misaalen de rahe the log jisakee kal talak hamako 
kise maaloom thaa vo bhee sitaaraa doob jaayegaa
****