|
* salam-e-aakhir ho shehr-e-yaraN, tumhari mehfil se ja raha huN, *
salam-e-aakhir ho shehr-e-yaraN, tumhari mehfil se ja raha huN,
fuzool ho gi talaash meri, maiN naqsh-e-pa bhi mita raha huN...
wafa k aiwaN saja di'ay haiN, andhery shab k miTa di'ay haiN,
charagh-e-ulfat ki lau na kam ho, mai khoon dil ka jala raha huN...
jo keh raha huN gila na samjho, jo mujh pe guzri jafa na jano,
ata hu'ay haiN jo daagh-e-hasrat, wo qasr-e-dil meiN saja raha huN...
jo baad mery h mujh se milna, hawa k jhoNkoN pe kan dherna,
faza'aiN deN gi gawahi meri, maiN geet aisy saja raha huN...
shabaab pr hay tumhari mehfil, luTa rahy ho khumar-o-masti,
butoo! mra bhi khyal rakhna, kabhi to maiN bhi khuda raha huN...
naei hay manzil, naya safar hay, Hayaat se ab mujhy mafar hay,
adam ki wadi ko jany walo! zara sa Thehro! maiN aa raha huN...
|
|