|
* Ulfat Mei.N Sadaa Wasl Ka Hi Mar-halaa Baaqi Rahaa *
Ulfat Mei.N Sadaa Wasl Ka Hi Mar-halaa Baaqi Rahaa
Laghzishei.N Thi Har Qadam, Par Hoslaa Baaqi Rahaa
Un Ko Chaaha, Un Ko Pooja, Bas Zaraa Mar Na Sakey
Un Ki Aankho.N Mein Hameshaa Ye Gila Baaqi Rahaa
Hamney Rakkhaa Tha Takhayyul Mei.N Chupaakar Uska But
Hijr Mei.N Bhi Wasl Ka Sa Silsilaa Baaqi Rahaa
Kuch Ko Aankho.N Se Pilaayee, Kuch Ko Usney Jaam Se
Darmiya.N Zaahid Wa Maikash, Faslaa Baaqi Rahaa
Usney Tark-e-rabt Kiya Phir Bhi The Ham Muntazir
Ik Dareechaa Dil Ki Basti Mei.N Khula Baaqi Rahaa
Ham Bhi Ghalib Ki Tarah Be-aabroo Hokar Chaley
Tera Maqtal Tha, Tera Hi Faislaa Baaqi Rahaa
Intezaar-e-zakhm-e-dil Karley 'Hayat' Ab Ishq Mei.N
Tere Dil Par Bhi Wafaa Ka Ye Silaa Baaqi Rahaa.
Jawaid Hayat
|
|