* Na Ashk Aankh Mei.N Baaqi Na Piyaas Hoti Hai *
Na Ashk Aankh Mei.N Baaqi Na Piyaas Hoti Hai
Wo Isi Baat Se Meri Udaas Hoti Hai
Hawaa Ke Saath BhaTakta Hoo.N Is Tajassus Mein
Kahaa.N Ki Aab-o-Hawa Mujh Ko Raas Hoti Hai
Wo Zid Hai Ya Ke Anaa Hai Jo Muskurati Hai
Agarche Sham Bhi Uski Udaas Hoti Hai
Bujhaaey Kis Tarah Tishna-Labi Ko Ashko.N Se
Wo Mujh Se seekh Le Jisko Bhi Piyaas Hoti Hai
Mai.N Is Liye Kabhi Furqat Ka Gham Nahi.N Kartaa
Ke Unse Khuwab Mein Milne Ki Aas Hoti Hai
Raqeeb Sab Mere Ham-Gham Hai.N Dosto.N Se Hai.N
Hai Dosti Wahi Jo Gham-Shanaas Hoti Hai
Tere Khayal Se Roshan Shab-e-Firaaq Meri
Hai Ek Boond Bhi Saaghar Jo Piyaas Hoti Hai
Hayat Wasl-e-Muhabbat Ki Tu Khushi Na Manaa
Zamaaney Bhar Ki Nazar Be Libaas Hoti Hai
****** |