* Mujh Ko Na Tha Gumaan Kisi Ki Nazar Tha Mai.N *
Mujh Ko Na Tha Gumaan Kisi Ki Nazar Tha Mai.N
Mujh Se Kisi Ko Ishq Tha Par Be-Khabar Tha Mai.N
Baad-e-khizaa.N Ka Zor Kabhi Kham Na Kar Sakaa
Sahra Ki Waadiyo.N Mei.N Mein Palaa Ik Shajar Tha Mai.N
Nazrei.N Thee.N Sang-taraash Kai But Banaa Liye
Pooja Nahi.N Kisi Ko Dil-e-Be-Asar Tha Mai.N
Wo Zindagi Ki Dhoop Se Dar Kar Chalaa Gaya
Saya Tha Jiska Or Sadaa Ham-safar Tha Mai.N
Mai.N To Shab-e-firaaq Mei.N Royaa Nahi.N Kabhi
Na Jaaney Kaisa Dard Tha Kiyo.N Tar-ba-tar Tha Mai.N
Hosh-o-hawaas Taab-o-tawaa.N Ishq Mei.N Gaye
Dil Mei.N Umeed-e-wasl Liye Dar-ba-dar Tha Mai.N
Shaayad Isi Liye Wo Wafaa Tark Kar Gayaa
Na Ishq Natawaa.N Tha Magar Uska Dar Tha Mai.N
Ye Bhi Sabab Tha Hasrat-e-Naakaam Ka Hayaat
Ke Ishq To Kiya Tha Magar Be-hunar Tha Mai.N
Jawaid Hayat
|