* DhaRhkanei.N Dil Ki Karei.N Mujh Ko Pareshaa.N Jaise *
DhaRhkanei.N Dil Ki Karei.N Mujh Ko Pareshaa.N Jaise
Merey Seene Mei.N Koi Raaz Ho Pinhaa.N Jaise
Meri Her Aah Merey Dil Mei.N Hi GhuT Jaati Hai
See Gayaa Koi Mera Chaak Girebaa.N Jaise
Ashk Pee Ker Bhi Meri Tishna Labi Hai Baaqi
Mausam e Gul Mei.N Chaman Ho Koi Weeraa.N Jaise
Woh Merey Dil Pe Musallat Hai.N Merey Ghum Ki Tarah
Woh Na They Pehle Kabhi Itney Meherbaa.N Jaise
Maut Ke Baad Huwe Dard Jo Aasaa.N Mujh Per
Zindagee Meri Huwii Mujh Se Pashemaa.N Jaise
Umr Bher Woh Merey Hamraah BhaTakta Hi Rahaa
Mera Saaya Bhi Huaa Mujh Se Pareshaa.N Jaise
Un Ko Bhooley Hai.N Na Bhoolengey 'Hayat' Aur Kabhi
Un Ki Yaadei.N Hai.N Merey Dard Ka Darmaa.N Jaise
By Jawaid 'Hayat'
|