|
* Qadam i.nsaa.N kaa raah-e-dahar me.n tharraa hii jaataa hai *
Qadam i.nsaa.N kaa raah-e-dahar me.n tharraa hii jaataa hai,
chale kitanaa hii ko_ii bachake Thokar khaa hii jaataa hai,
nazar ho Khvaah kitanii hii haqaa_iq-aashnaa phir bhii,
hujuum-e-kash_ma_kash me.n aadamii ghabaraa hii jaataa hai,
Khilaaf-e-masalehat mai.n bhii samajhataa huu.N magar naaseh,
vo aate hai.n to chehare par tahayyur aa hii jaataa hai,
havaaye.N zor kitanaa hii lagaaye.N aa.Ndhiyaa.N banakar,
magar jo ghir ke aataa hai vo baadal chhaa hii jaataa hai,
shikaayat kyo.n ise kahate ho ye fitarat hai i.nsaa.N kii,
musiibat me.n Khayaal-e-aish-e-raftaa aa hii jaataa hai,
samajhtii hai.n ma'al-e-gul magar kyaa zor-e-fitrat hai,
sahar hote hii kaliyo.n ko tabassum aa hii jaataa hai. |
|