|
* Jo pahle thaa vo ab manzar nahiiN hai, *
Jo pahle thaa vo ab manzar nahiiN hai,
hamaaraa ghar hamaaraa ghar nahiiN hai,
mere kaaNdhoN pe meraa sar hai lekin,
kisii ke haath meN patthar nahiiN hai,
Faraat-e-zindagii itnaa samajh le,
yahaaN ko’ii Ali Asghar nahiiN hai,
(Faraat : Euphrates; Ali Asghar : Youngest martyr at the battle of Karbala)
mahaktii haiN bahut yaadoN kii fasiileN,
hamaaraa zehn ab banjar nahiiN hai,
(fasiil : a low wall)
jise dekho use baahar se dekho,
ko’ii bhii zaat ke andar nahiiN hai,
tumheN ye jang Khud laRnii paRegii,
abaabiiloN kaa ab lashkar nahiiN hai,
(abaabiil : A kind of small bird)
simaT hii jaayeNge paaNv hamaare,
magar ham kyaa kareN, chaadar nahiiN hai,
tamannaa but-garii kii kyaa ho puurii,
tumhaare shah’r meN “Aazer” nahiiN hai.
(but-garii : idol worship)
|
|