* Bas ik jhijhak hai yahii haal-e-dil sunaane me.n *
Bas ik jhijhak hai yahii haal-e-dil sunaane me.n
ki tera zikr bhii aayegaa is fasaane me.n.
baras paRii thii jo rukh se naqaab uthaane me.n
wo chaaNdnii hai abhii tak mere ghareeb-khaane me.n.
isii me.n ishq kii qismat badal bhii saktii thii
jo waqt beet gayaa mujh ko aazmaane me.n.
ye keh ke toot paRaa shaakh-e-gul se aakhirii phool
ab aur der hai kitnii bahaar aane me.n.
|