غزل
بہ شوق دیدہ و نادیدہ خواب لکھنے آ
یہ سادہ دل ہے، محبت کا باب لکھنے آ
لچک کے ٹوٹ گئی شاخ شاد مانی کی
ہنوز بستہ کلی ہوں، گلاب لکھنے آ
عجب ہے دھند امید و یقیں کے چہرے پر
اس آئینے پہ کوئی آب و تاب لکھنے آ
یہ پیچ وخم بھی عجب ہے، ترے سوالوں میں
اُلجھ رہاہے مرا دل، جواب لکھنے آ
شب فراق گزاری ہے ہم نے برسوں برس
اے ساقیِ غمِ دل! آ، شراب لکھنے آ
کہیں سے بنتی نہیں ہے عذاب کی صورت
گناہگار ترا ہوں،۔ عتاب لکھنے آ
قلم کے زور پر اب کیا رقم کرے راقم
کوئی تو حرف میں روشن کتاب لکھنے آ
********