نعت پاک

صبا مدینے کے جب گلستاں سے آئے گی
مرے حضورؐ کی خوشبو وہاں سے لائے گی

طلسم کفر کا ٹوٹے گا دین جاگے گا
صدائے کلمۂ طیب اذاں سے آئے گی

کرم کے پھول جو بانٹے گا حشر میں خالق
مہک گلوں میں شہِ دو جہاں سے آئے گی

میں اپنی آنکھ میں سرمہ بناکے رکھ لوں گی
جو خاکِ پائے نبیؐ آستاں سے آئے گی

ہمارے دل میں سمندر ہے عشقِ احمدؐ کا
ہماری راہ میں دوزخ کہاں سے آئے گی

نگاہِ لطف سے آقاؐ ضرور دیکھیں گے
نوائے درد جب اشکِ رواں سے آئے گی

جو چاہتی ہو کہ خالق سے گفتگو کرلیں
وہ بات خالدہ وردِ قرآں سے آئے گی

خالدہ صدیقی

76, Ashoka Vihar
Nagar Nigam Colony (Bhopal)
Mob: 9424455367 / 9229964882
بشکریہ ’’عندلیبانِ طیبہ‘‘ مرتب: مشتاق دربھنگوی
……………………………………