Abhi sey jashn ka aalam hai kyuN sitaroN meiN?
abhi mein theek sey dooba nahiN hooN ghaaroN meiN
 
mira wajood samandar sey aa mila hai magar
mein reh gaya hooN kahiN door aabsharoN meiN
 
kisi talash e musalsal ney kar diya tanha
wagarna mein bhi kabhi tha tumhari daaroN meiN
 
pakarhh ley dhoop ki ungli aur aasmaN ho ja
nahiN to behta rahega yuNhi kinaroN meiN
 
na janey dasht ki wehshat hai ya hawaaoN ki
ya imtezaj hai donoN ka in GhubaaroN meiN?
 
bata rahi hai lahoo meiN sani hui mitti
bhatak gaya tha koi raat khaarzaroN meiN
 
woh aag bujh to gayee ;Shaad; par Ana apni
chhupa kay rakh gayee kuchh un-bujhey sharaaroN meiN
*****************