nayee ik samt ki janib wahiN sey raasta nikla
jisey manzil samajh baithhey they wo to marhala nikla
 
mirey baatin sey barhh kar ho gaya roshan mira zaahir
Sadaf hairatzada hai , yeh mirey seeney sey kya nikla?
 
kiya jab apni aashufta-sari ka tajzia meney
sabab us ka zaroorat sey ziada sochna nikla
 
meiN uskay rakh-rakhao hi kay dhokey mein raha ab tak
bahut sairaab lagta tha magar Sehra-numa nikla
 
kisi ney ;Shaad; kab likhkhi mukammal daastaN apni?
kitab e zindagi kay har waraq mein haashia nikla