mirey is jurm par farda khafa hai
ke mera raftgaaN sey raabta hai
 
jarhheiN meri bahut sehami hui haiN
nayee Mitti, nayee aab o hawa hai
 
naye ghar ko sajaaney meiN laga hooN
purana ghar bahut yaad aa raha hai
 
yeh meiN ehsaas sey kyuN kat chuka  hooN?
ragoN sey khoon aksar poochhta hai
 
rahega zom meiN kuchh pal yeh Darya
 Samandar meiN abhi aa kar mila hai
 
mujhey to dhoop ney dhokey mein rakhkha
'tira saaya tirey qad sey barhha hai'
 
ab aaye raat to is ko samaitey
yeh Suraj har taraf bikhra parhha hai
 
usi ki aabyari kar raha hooN
mujhey jo dard wirsey mein mila hai