وفا کے باب نے لکھّی تھی جو کہانی نئی
اُسی نے دی ہے مجھے پھر سے سرگرانی نئی
محبّتوں کا کیا ذِکر تو فلَک بولا
یہ کِس نے چھیڑی ہے اُلفت کی لَن ترانی نئی
شِکستہ پائی مِری رُوح کا بنی ناسور
سِسکتی ریت نے صحرا کی خاک چھانی نئی
ہے داغدار بہت عزّتوں کا پیراہن
نوا کے ابر میں لپٹی ہے وہ نشانی نئی
نجانے کون سے لمحوں میں رکھ گئی ہے خِزاں
بہارِ غم کے دریچوں میں گُل فشانی نئی
سِلے ہیں ہونٹ کِسی کے، کسی نے زہر پیا
ہوئی ہے دار و رسن پر یہ مہربانی نئی
یہ کون درد کے دریا کے پار اُترا ہے
ہوئی ہے خاک بسر ِکس کی حکمرانی نئی
یہ دُھوپ چھائوں کہاں مانتے تھے میری بات
وفا کے شہر میں اُتری ہے بے مکانی نئی
گُماں کا دم لگا گھٹنے جنوں بھی رونے لگا
سحاَب رات نے چھینی ہے پھر جوانی نئی
مِرے عدُو نے ہے مانگا مِرا پتہ پھر سے
یہ کہہ کے کرنی ہے تجدید پھر پرانی نئی
مَنا کے جشن جو مقتل میں شاد ہے اِتنا
اُسے مِلی ہے کوئی آج کامرانی نئی
ہُوا ہے خوشبوئوں کا پھر جہان لافانی
کنولؔ نے آب کو دی ہے یہ لا مکانی نئی
ایم زیڈ کنول۔۔۔۔۔۔۔۔۔۔۔۔۔۔۔۔۔۔۔۔۔۔لاہورؔ
