غزل

سزا کے طور پر سادہ سی بھول رکھ دینا
دعا کے ہاتھ میں لفظوں کے پھول رکھ دینا
نبھا سکوگے وفا تم نہ جب کسی صورت
برائے رقصِ وکالت اصول رکھ دینا
جو معتبر ہو تمہاری نظر میں تم لے لو
مرے لئے جسے سمجھو فضول رکھ دینا
جنوں پسند ہوں دشوار راستوں کی قسم
قدم جہاں پہ رکے تم ببول رکھ دینا
یہ سب کمال تمہاری ادائے خاص کا ہے
کسی کو شاد کسی کو ملول رکھ دینا
سفر ، تلاش ، تھکن ، راستے ، نشاں ، منزل
ہوا کو آتا ہے چہرے پہ دھول رکھ دینا
طویل دیکھو کتابِ سفر نہ ہو راہی
زمانے والے جو کرلیں قبول رکھ دینا

محمود راہی اورنگ آبادی

K.M.Store, 47, Karaya Road
(Park Circus Market) Kolkata-700017
Mob: 9007360378
بشکریہ ’’میر بھی ہم بھی‘‘	مرتب: مشتاق دربھنگوی
………………………