* da'waa humen to jurat e izhaar ka bhi hay *
da'waa humen to jurat e izhaar ka bhi hay
apni gharz na ho to koi bolta bhi hay
jalta hay zehen kashf e haqaaiq se raat din
is aagahi se or barri kuch saza bhi hay
shehron man zindagi ka buhat shor hay magar
mafhoom jismen ho koi aisi sadaa bhi hay
lamhon main hain aseer ,giraftaar e rang hain
yaaro!! hisaar e waqt kabhi torrna bhi hay
taareek raaston pe hain chup chaap muntazir
aise kisi pe roshni ka dar khula bhi hay
hum ttoott'tay hain "SHAM", simatt'te nahi kabhi
is intishaar e zaat ki kuch intihaa bhi hay
|