* Misaal e shama jalaati hay zindagi hum ko *
Misaal e shama jalaati hay zindagi hum ko
k lamha lamha ghattaati hay zindagi humko
hamaare jism k zarron se jo ibaarat hay
wohi kahaani sunaati hay zindagi humko
hum apni aag main jal kar dawaam paa bhi gaye
'ajab k ab jo bulaati hay zindagi humko
bas aik lamhay ki chokhatt pe waarne k liay
tarha tarha se sajaati hay zindagi humko
na koi chashma e khuahish na aabshaar e talab
faqat saraab dikhaati hay zindagi humko
bikkharne lagte hain jab rang urrne lagtay hain hum
thapak thapak k sulaati hay zindagi humko
udaas SHAM ki aankhon main,chaand k dil main
usi ki shakal dikhaati hay zindagi humko
|