Dil main jab teri lagan raqs kiya karti thi
meri har saans main khushbu si basaa karti thi

ab to mehfil se bhi hota nahi kuch gham ka ilaaj
pehlay tanhaaii bhi dukkh baantt liya karti thi

ab jo raqsaan hay kaii rang bharay chehron main
yahi mitti kabhi be kaar urra karti thi

rang k jaal hi miltay hain jidhar jaata hoon
roshni yoon na mujhe tang kiya karti thi

ab mujhe chaandni kuch bhi to nahi kehti hay
kabhi ye tere sandese bhi diya karti thi

kis qadar piyaar se ye payrr bulaatay thay mujhe
kis tarha chhaaon tera zikar kiya karti thi

ye dar o baam kabhi SHAM liapatt'tay thay mujhe
har gali barrh k qadam choom liya karti thi