حاصل عشق غم ِدل کے سوا کچھ بھی نہیں
اور اگر ہے تو سب ان کا ہے مرا کچھ بھی نہیں
جس پہ بنیاد تمنا رکھی ہے دل نے 
ان کے انداز تخاطب کے سوا کچھ بھی نہیں
کردیا مست مری جرأت رندی نے مجھے
ورنہ تیرے لب رنگین کا مزا کچھ بھی نہیں
جو خدا دے تو بری چیز ہے احساس جمال
لیکن اس راہ میں ٹھوکر کے سوا کچھ بھی نہیں
آپ ہی آپ الجھتی ہے مری وحشت دل
اب کھلا یہ کہ خم زلف دوتا کچھ بھی نہیں
میں نہ دیکھوں تو تیرے حسن کی قیمت کیا ہے
میں نہ تڑپوں تو یہ انداز جفا کچھ بھی نہیں
ان کی پلکوں پہ بھی شبنم سی گری تھی دم صبح
میں نے پوچھا کہ یہ کیا ہے تو کہا کچھ بھی نہیں
وقت کے ساتھ بدل جاتی ہے دنیا میکش 
جس پہ ہم جیتے تھے وہ عہد وفا کچھ بھی نہیں
***********************