* خزاں کی تیغ پہ ہے خون نسترن باقی *
خزاں کی تیغ پہ ہے خون نسترن باقی
ابھی ہے رنگ چمن نکہت چمن باقی
بدل گیا ہے چمن میں مزاج لالہ و گل
ہے اک مجھی میں تری بوئے پیرہن باقی
ہوا زمانہ کہ رستے ہیں عشق کے ویراں
نہ راہ رو ہی کوئی ہے نہ راہزن باقی
چلے تھے چند قدم ہی وہ میرے ساتھ مگر
ہے آج تک رہ الفت میں بانکپن باقی
نہ بت کدے میں برہمن نہ شیخ کعبے میں
مگر ہے معرکہ شیخ و برہمن باقی
فسانے کیامری وارفتگی کے تازہ ہیں
نہیں تو زلف بتاں میں ہے کیوں شکن باقی
مجھی کو قدر زمانہ نہیں ہے اے میکش
وگرنہ ہے تو زمانہ میں قدر فن باقی
************************** |