غزل
یہ ترا حسن ، مرا سوز۔ نہاں کچھ بھی نہیں
دیکھ اس دشت میں آوازہ ء جاں کچھ بھی نہیں
بات تو تب ہے کسی درد کے سانچے میں ڈھلے
ورنہ یہ مرحلہ ء عشق۔ بتاں، کچھ بھی نہیں
چل پڑے راہ۔ طریقت پہ تو دیکھا کہ یہاں
صرف حیرت ہے یقیں اور گماں کچھ بھی نہیں
کوچہء عشق ہے یہ سر کو ہتھیلی پہ دھرو
یہ وہ رستہ ہے جہاں سود و زیاں کچھ بھی نہیں
باریابیء سخن کو ہیں زمانے درکار
سو ترا حرف و بیاں، عمر۔ رواں کچھ بھی نہیں
دولت۔ نام و نسب، علم و ہنر سب تھا مگر
جاں سے گذرے تو بچا نام و نشاں کچھ بھی نہیں
کتنے جی جان سے ، محنت سے کمایا تھا اسے
اب یہ جانا کہ یہ اسباب۔ جہاں کچھ بھی نہیں
مجید اختر