اُنہیں تُو نے بخشی ہیں کوٹھیاں، تری شان جَلّ جَلآَلُهْ
میں ہوں لالُو کھیت میں لامکاں، تری شان جَلّ جَلآَلُهْ

وہ کہ تیرے دِین سے دُور کا بھی نہیں جنہیں کوئی واسطہ
وہ ہیں تیرے دِین کے پاسباں، تری شان جَلّ جَلآَلُهْ

کوئی فاقہ کر کے بھی ہے مگن، کوئی دال بھات پہ مطمئن
ہیں کسی کے پیٹ میں مرغیاں، تری شان جَلّ جَلآَلُهْ

تُو یہ جانتا ہے کہ تیرے بندوں نے دہر میں ترے نام پر
وہ ستم کئے ہیں کہ "الاماں"، تری شان جَلّ جَلآَلُهْ

کہیں دورِ جامِ شراب ہے، کہیں رقصِ حسن و شباب ہے
کہیں نامرادی ہے نوحہ خواں، تری شان جَلّ جَلآَلُهْ

یہ ترا مجید، ترے سوا کہے کس سے درد کا ماجرا؟
تُو ہی غم کی سُنتا ہے داستاں، تری شان جَلّ جَلآَلُهْ

مجید لاہوری