Khatm-e-shor-e-tufan tha dur thi siyahi bhi 
dam ke dam men afasana thi meri tabahi bhi

Iltafat samajhun ya berukhi kahun is ko 
rah gai khalish ban kar usaki kamanigahi bhi

Yad kar vo din jis din teri sakhtgiri par 
ashk bhar ke uthi thi meri begunahi bhi

Shama bhi ujala bhi main hi apani mahafil ka 
main hi apani manzil ka rahabar bhi rahi bhi

Gumbadon se palati hai apani hi sada "majrooh" 
masjidon men ki jake main ne dadakhvahi bhi