Yahii.n kii thii mohabbat ke sabaq kii ibtadaa mai.n ne, 
yahii.n kii jurrat-e-izhaar-e-harf-e-mudd'a mai.n ne ,
yahii.n dekhe the ishv-e-naaz-o-a.ndaaz-e-haya mai.n ne ,
yahii.n pahale sunii thii dil dha.Dakane kii sadaa mai.n ne ,
yahii.n kheto.n me.n paanii ke kiinare yaad hai ab bhii ,
dilo.n me.n izdaham-e-aarazuu lab ba.nd rahte the ,
nazar se guftaguu hotii thii dam ulfat kaa bharte the ,
na maathe par shikan hotii, na jab tevar badalte the ,
Khudaa bhii muskuraa detaa thaa jab ham pyaar karte the ,
yahii.n kheto.n me.n paanii ke kiinare yaad hai ab bhii ,
wo kyaa aataa ke goyaa daur me.n jaam-e-sharaab aataa, 
wo kyaa aataa rangilii raaganii rangii.n rabaab aataa ,
mujhe rangiiniyo.n me.n rangane wo rangii.n sahaab aataa, 
labo.n kii mai pilaane jhuumataa mast-e-shabaab aataa ,
yahii.n kheto.n me.n paanii ke kiinaro yaad hai ab bhii ,
hayaa ke bojh se jab har qadam par laGhazishe.n hotii.n ,
fazaa.N me.n mu.ntasar rangii.n badan kii larazishe.n hotii.n,
rabaab-e-dil ke taaro.n me.n musalasil jumbishe.n hotii.n ,
Khifaa-e-raaz kii pur_lutf baham koshishe.n hotii.n ,
yahii.n kheto.n me.n paanii ke kiinare yaad hai ab bhii, 
balaa-e-fikr-e-fardaa hamase koso.n duur hotii thii, 
suruur-e-sarmadii se zindagii maamuur hotii thii, 
hamaarii Khilwat-e-masuum rashq-e-tuur hotii thii ,
malak jhuulaa jhulaate the Ghazal-Khwaa.N huur hotii thii ,
yahii.n kheto.n me.n paanii ke kiinare yaad hai ab bhii ,
na ab wo khet baaqii hai.n na wo aab-e-rawaa.N baaqii 
magar us aish-e-raftaa kaa hai ik dhu.ndalaa nishaa.N baaqii.