غزل
ڈاکٹر منصور خوشتر
ہو گئی راہ وفا آسان کچھ
اب وہ میری بات لیتے مان کچھ
کس طرح میری وفا ہو کا میاب
اس کی دشمن سے بھی ہے پہچان کچھ
پھول، پتے، غنچہ و گل تھے جہاں
وہ جگہ ہے آج کل ویران کچھ
جو ادائے یار پہچانے نہیں
آپ ایسے بھی نہیں نادان کچھ
مسکراکر اس نے دیکھا ہی تو تھا
دل میں کیوں ہے شورشِ طوفان کچھ
راہ زن کو جو سمجھتے رہ نما
ہم میں ایسے ہیں ابھی نادان کچھ
آرزو و اضطراب و اشتیاق
خشترؔ اپنا ہے یہی ،سامان کچھ
*******************