اے بناے حرف لا اس حرف کے اندر بھی ہے 
ماوراے خواب بھی ہے خواب کا پیکر بھی ہے 
 
تو متاع اختراع جلوہ ذات خودی 
اندر آئینے کے بھی آئینے کے باہر بھی ہے
 
تیرے میرے درمیان الا کا لا کا مسلہ
اور یہی اک مسلہ مابین خیر و شر بھی ہے 
 
آشنا تیرا نہیں تجھ سے کوئی بڑھ کر مگر 
تو سراپا راز بھی ہے راز کا مظہر بھی ہے 
 
فکر انساں میں تجس خیز ہے یہ بھی سوال 
خالق عدنی بشر تو خالق اکبر بھی ہے
 
بے نیازی میں تیری ہے ناز بھی حیرت فروش
تیرے انداز نظر میں عالم محشر بھی ہے
 
تیری ذات وحدہ از خود بناے امتیاز 
ہے کبھی زخم تمنا اور کبھی نشتر بھی ہے 
 
میں حریم ناز تیرا تو میرا شہر پناہ 
یعنی درد آگہی بھی اور جنوں کا سر بھی ہے 
 
چہرہ بھی آئینہ بھی اور پردہ دار جلوہ بھی 
پیش منظر بھی توہی تو ہی پس منظر بھی ہے
******