|
* murjhaya honto’n ka tabassum, uda hua tasweer ka rang, *
murjhaya honto’n ka tabassum, uda hua tasweer ka rang,
kis kis rang se mil ke bana hai kya jane taqdeer ka rang!
Talkh haqeeqat ki mitti main khwab ke dane boye hai’n,
Jane fasal ugegi kaisi, kya hoga taabeer ka rang!
Roshan thi hatho’n ki lakeeren peshani pe bal bhi na tha,
Lekin kaise pheeka pad gaya apni har tadbeer ka rang!
Uljhi uljhi mabham mabham meri kahani harf ba harf,
Tala hua meezan-e-nazar per jazbon ki taseer ka rang!
Jane ulajh ke kis uljhan main zehan hua paband nigaah,
Aankho’n aankho’n ko deta tha khwabon ki tabeer ka rang!
Toot gaye takhayyul ke par ab kon ufaq par dale nigah,
kon shafaq ki surkh nadi se chhane nain ke neer ka rang!
Naqad wa nazar ke paimane se fun ki salabat poochhti hai,
Kis qeemat pe mil sakta hai shohrat aur tash heer ka rang!
Kaun karega baya’n mere afsane ki talkhees kaho,
Kaun nazar ke pyale me gholega meri tahreer ka rang!
Kaun sunega, kise sunaoo’n, manzar apne dil ki hadees,
Kis ki samaat se mansoob karoo’n apni taqdeer ka rang!
****** |
|