Rang  rang  har  subah  ka  manzar  jaise  khawab  dewane  ka,
Kiya  jane  anjaam  talak  kya  raaz  khule  afsane  ka!
 
Ghulne  laga  hai  nazar  nazar  mai’n   teri  haqeeqat-e-haal  ka  rang,
Toot  raha  hai  qadam  qadam  par  bharam  tere  afsane  ka!
 
Apni   duniya’n   dekh  chuka  ab   tera  zamana  dekhunga,
Kah  jo  saka  to,  tu  bhi  kah  le  khawab  hai yeh  deewane  ka!
 
Tere  karishme  mai’n   ne  dekhe  tu  bhi   tamasha  dekh  mera,
Taul   raha   hoon  palak  palak  par  aks  is  aaina  khane  ka!
 
Mere   qisse   meri   kahani   mujh  se  hain  mansoob   tamaam,
Ghazlen  meri  kya  khwab  bune’n  gi  apne  aur  begane  ka!
 
Ab bhi  ameen-e-naqsh-e-kaf-e-pa  raah  guzar  is  shahar  ki  hai,
koi  bhi  imkaan   nahi   hai   laut  ke   ab   ghar  jane   ka!
 
Daad   bhi  di  hai  yoon  logo’n   ne   parh  kar  mere  dil  ki  hadees,
Kya   unwaan  hai  manzar  sahib  aap  ke  is  afsane   ka?
*******