|
* Phir khwab ke sine per tabeer ka sar rakh do! *
Aiwaan-e-takhaiyul mein, qindeel-e-nazar rakh do,
Phir khwab ke sine per tabeer ka sar rakh do!
Ehsas ki palko per jazbon ka asar rakh do,
Afkaar ke shano per jibreel ka par rakh do!
Tafseer jo likhni ho harfon ke moqadder ki,
Taweel-e-ma-ani mein tanweer-e-nazar rakh do!
Tamsheel ki surat mein anfaas ki lai jaage,
Tum qalb-e-mohabbat mein gar shoal-e-tar rakh do!
Ek shamm-e-ghazal rakh do shabgeer fazaon mein,
Anfaas ke taron per naghmat-e-sahar rakh do!
Takhreeb ke but dha do, taameer ka mausam hai,
Is raat ki aankhon mein, imkan-e-saher rakh do!
Usloob ki jiddat ho, tarteeb-e-ibarat mein,
Tashkeel-e-ma-ani mein mafhoom-e-diger rakh do!
Rangeen qaba de do, be-rangi-e-alam ko,
Ankhon mein zamane ki rang-e-gul-e-tar rakh do!
Be chehra naseebon ko, chehre ki zarurat hai,
Le jao ye aaina, aaina udher rakh do!
Manzar ye ghazal wale, usloob-e-ghazal samjhein,
Tum harf-e-alamat mein, jazbon ka asar rakh do!
******* |
|