reza reza hue tabindah khayalo'n ke warq,
tergi chaat ti jati hai ujalo'n ke warq!
 
haashiya haashiya tafseer tamanna ke liye,
le ke aayi hai nazar apni masalo'n ke warq!
 
daagh roshan hai'n mere seene ke,sehra-e-jonoo'n,
mujh se kyon aankh churate hain ye lalo'n ke warq!
 
hont khamosh,zabaa'n band,nazar gumsum si,
bujh gaya dil,na bujhe jalte sawalo'n ke warq!
 
zawi-e-fikr ke badle nayee taweelo'n se,
be asar ho gaye pareenah moqalo'n ke warq!
 
mere moris ka jo tarka tha na mahfooz raha,
deemake'n chaat gayeen kohnah resaalo'n ka warq!
 
kya pata ahle jonoon samjhe ise kya Manzar,
hosh walon ne jalaye jo hawalo'n ke warq !
******