غزل

تو جھوٹ موٹ دوستوں کے ہاں میں ہاں ملائے رکھ
یہ وقت کا مزاج ہے کسی طرح نبھائے رکھ
ترے مرے دکھوں کا غم ترے مرے سوا کسے
میں بھولتا ہوں اپنا غم تو اپنا غم بھلائے رکھ
کوئی تو قافلہ ادھر بھی خوشبوئوں کا آئے گا
فصیلِ ممکنات پر تو اِک دیا جلائے رکھ
میں خود نصیب سے بہت ڈرا ہوا غریب ہوں
تو مجھ سے مل ضرور پر یہ دوریاں بنائے رکھ
مرا بدن سلگ اُٹھا تری حیا کی آنچ سے
مری ہوس کو اپنی تمکنت سے گد گدائے رکھ
گذشتہ موسموں کا زخم زرد ہے نگاہ میں
نئی رتوں کی دھار سے بدن ذرا بچائے رکھ
سفر طویل ہو یا مختصر تری حیات کا
تو زندگی کو دائو پر اے ہم سفر لگائے رکھ
****