Mursal ki risaalat me nabuwat me hai qur”aan
Har zarrah e kaonain ki khilqat me hai qur”aan
 
Asraar ke irfaan , haqeeqat me hai qur”aan
Ma”abood ki azmat me mohabbat me hai qur”aan
 
khursheed me taaron me zameen aour fezaa me
mahtaab ke maathe ki ,lataafat me hai qur”aan
 
is baat ka har khurd o kalaan shaahide ainee
akseer har ik dard o moseebat me hai qur”aan
 
qur”aan ki taaleem pe paaband agar ho
qaaree nazar aata hai haqeeqat me hai qur”aan
 
who shakhs hai be khaof jahannam se dare kiun
jis zaat ke seene me telaawat me hai qur”aan
 
e”jaaz ye ummat ko mila fazle nabi se
har bandah e moomin ki ibaadat me hai qur”aan
 
Hassaas pe allah ki rahmat ki ghataa hai
Hassaas ke eimaan . aqeedat me hai qur”aan
**************