|
* Baat samjho ki har ik baat ,bayaaN, hotee hai *
Baat samjho ki har ik baat ,bayaaN, hotee hai
Dil ki har baat to manzil ka nishaaN hotee hai
Baat ye hai teree har baat hai peyaaree mujh ko
Warna har baat me taaseer kahaaN hotee hai
Baat bey baat pe tum baat banaatey kiuN ho
Baat to baat hai hotee hai jahaaN hotee hai
Baat who baat hai jis baat se kuchh baat baney
Warna har baat yaqeeN ho to gumaaN hotee hai
Tum to bekaar me har baat pe laD jaatey ho
Baat hotee hai kahaaN ,baat jahaaN hotee hai
Baat koyee bhi ho woh apna asar rakhtee hai
Baat un ki ho to kuchh aor jawaaN hotee hai
Baat hoNtoN se agar ho to koyee baat nahi
Baat abroo se agar ho to kamaaN hotee hai
Baat to baat hai tahleel huyi jiuN niklee
Baat kaa jism hai ,, phir baat kahaaN hotee hai
Baat kuchh log hawaaoN me uDaa detey haiN
Aor ye kahtey haiN ki hassaas zabaaN hotee hai
**************** |
|