* Dhoop barsaat ki taa deyr samaayi huyi hai *
Dhoop barsaat ki taa deyr samaayi huyi hai
Tab kaheeN tursh maza itni khaTaayi huyi hai
Ye jo ik shaaerah baithi hai terey pahloo me
Bivi to hai nahi lagtaa hai pataayi huyi hai
Qaumi leader hai miyaaN wo bhi sanad yaafta hai
PARLIAMENT me is ki bhi thokaayi huyi hai
Hai naya saal sunaayeN bhi naya taazah kalaam
Yeh ghazal aor kayi baar sunaayi huyi hai
Aap haiN sadr to kuchh deyr ko khamosh rahen
Aap ki baat ney yeh baat baDhaayi huyi hai
Us ne bhejaa hai baDey peyaar se bosa deke
Tab kaheeN surkh merey yaar miThaayi huyi hai
Us ki nazreN haiN jigar gurda siri paaye par
Teri ammaaaN to bahar taor qasaayi huyi hai
kiuN na maiN bivi ki har baat pe AAMANNAA kahuN
saale ne peechhey se bandooq saTaayi huyi hai
aap haiN shahr e ghazal bahr bhi seekheN hazrat
muft me she’r se ik aag lagaayi huyi hai
bhooltaa us ko to phir jaan lo pal pal martaa
who BHULAAYI na gayi is me BHALAAYI huyi hai
deykh ke husn bahot teyz DRIVE na kareN
ROAD hai theek magar aagey khodaayi huyi hai
maiN ne pahnaayiN tujhe chooDiyaN lazzat leke
kitni khush raNg magar teri kalaayi huyi hai
chheyd ho jism me to jism to kaTtaa hai zaroor
naak chhedwaa ke tu ne naak kataayi huyi hai
Har koyi saahab e dastaar bana phirtaa hai
AABROO kis ne magar apni bachaayi huyi hai
Wo hai SCIENCES pe kuchh zeyaadah amal pairaa aaj
Mard hai .. us ki magar god bharaayi huyi hai
Meri ghazloN ko nahi aap ki hujjat darkaar
Main ne ik raah nayi apni banaayi huyi hai
log kahtey hain ki ilzaam e ghaban hai us par
who to kahtaa hai faqat us ki chaNtaayi huyi hai
hai ghazal aap ki , doojey ne paRhi , kiuN paNgaa
is ki qeemat to bahar haal chukaayi huyi hai
tu ne hoNtoN se chuwaa is ko basad naaz o adaa
kitni khush zaayeqah ab jaa ke malaayi huyi hai
main ki huN chaar adad bachhoN ka ABBU hassaas
log haiN poochtey kiya teri sagaayi huyi hai
**** |